Si pasojë e mosrespektimit të rregullave në trafik, ndodhin një numër i madh i aksidenteve çdo ditë në vendin tonë. Në shumë raste viktima janë edhe këmbësorët, të cilëve shpesh herë u rrezikohet edhe jeta, si pasojë e pakujdesisë së shoferëve gjatë vozitjes, raporton Gazeta Sinjali.
Një aksident i tillë ka ndodhur edhe të hënën në mbrëmje në rrugën “Mursel Osmanaj” në Prizren, ku një automjet ka goditur një këmbësor i cili ka pësuar lëndime të rënda trupore.
Për shkak të lëndimeve të marra, këmbësori 22-vjeçar është dërguar për tretman mjekësor me urgjencë në Qendrën Emergjente në Prizren, pasi ka pësuar frakturë në njërën këmbë. Sinjali mëson se deri te aksidenti dyshohet të ketë ardhur kur shoferi i veturës Q.B., nga pakujdesia ka goditur këmbësorin, i cili ishte duke lëvizur në atë pjesë.
Në vendin e ngjarjes kanë dalë edhe njësitet policore, me ç’rast e dyshuara ka dhënë deklaratë para Policisë për aksidentin për të cilin dyshohet.
