Shtëpia e fëmijërisë së Papa Leon XIV del në shitje për 250 mijë dollarëShtëpia ku Papa Leon XIV – Papa i parë amerikan në historinë e Kishës Katolike – kaloi fëmijërinë, po del në shitje përmes një ankandi luksoz, pas një vale të papritur interesimi që shpërtheu pas emërimit të tij në Selinë e Shenjtë më 8 maj.
Prona ndodhet rreth 32 kilometra në jug të Çikagos dhe përfshin tre dhoma gjumi. Ankandi do të nisë me çmimin fillestar prej 250 mijë dollarësh, ndërkohë që shitësi ka bërë të ditur se është i gatshëm të pranojë një ofertë në çdo moment para përfundimit të ankandit më 18 qershor.
Fillimisht, kjo shtëpi ishte një pronë tipike banimi dhe u listua në janar për 219 mijë dollarë, pas një rinovimi të plotë nga një investitor i pasurive të paluajtshme, i cili e kishte blerë një vit më parë për vetëm 66 mijë dollarë. Megjithatë, edhe pas një uljeje të çmimit në 199 mijë dollarë, shtëpia nuk tërhoqi interes për disa muaj dhe qëndroi në treg pa lëvizje.
Gjithçka ndryshoi më 8 maj. Vetëm pak orë pasi Kardinali Robert Francis Prevost, 69 vjeç, u shpall Papë dhe mori emrin Leon XIV, shitësi e tërhoqi menjëherë shtëpinë nga tregu, pasi brenda pak orësh kishte marrë tetë oferta.
Interesi për pronën u rrit dukshëm kur u bë e ditur se Papa i sapozgjedhur kishte kaluar dy dekada të fëmijërisë së tij në këtë shtëpi, ku jetonte me të atin Louis, një mësues, nënën Mildred, një bibliotekare, dhe dy vëllezërit e tij.
Sipas ekspertëve të tregut të pasurive të paluajtshme, ankandet luksoze po bëhen gjithnjë e më të zakonshme për prona që kanë karakter të veçantë dhe nuk përputhen me format tradicionale të shitjes.
“Kjo është një pronë unike, me vlerë simbolike dhe historike. Ankandet luksoze janë një mënyrë për të përcaktuar vlerën reale të tregut kur kemi të bëjmë me histori të tilla të jashtëzakonshme,” – u shpreh përfaqësuesi i ankandit, Haghani.
Ndërkohë që Vatikani nis një epokë të re nën drejtimin e Papa Leon XIV, shtëpia ku nisi udhëtimi i tij shpirtëror mund të shndërrohet jo vetëm në një trofe të rrallë për blerësin e ri, por edhe në një pjesë të rëndësishme të historisë amerikane brenda Kishës Katolike./GAZETA PAPIRUS/
