Drejtoria për Hetimin e Krimeve Ekonomike dhe Korrupsionit në koordinim me Prokurorinë Speciale, kanë zhvilluar një aksion të hënën në rajonin e Gjilanit, që rezultoi me arrestimin e një personi të dyshuar për veprimtari të kundërligjshme dhe konfiskimin e një shume të mëdha të parave.
Operacioni policor u krye në një lokacion në magjistralen Prishtinë – Gjilan, ku bazuar në një plan taktik, Policia arriti ta ndalojë të dyshuarin, i cili u kap me mbi 100 mijë euro, që dyshohet se janë të falsifikuara.
Sipas mediumit ”Sinjali”, thuhet se personi që po drejtonte veturën ku u gjetën paratë është Skender Sadiku, rreth 50-vjeçar.
Lidhur me rastin, Policia ka kryer edhe kontroll në shtëpinë e të dyshuarit, ku ia gjetën makinën që shërben për t’i numëruar paratë.
Në total, zyrtarët policorë kanë konfiskuar 100 mijë euro në kartëmonedha nga 200 euro, 5 mijë euro në kartëmonedha nga 100 euro, makinën për numërimin e parave dhe disa telefona.
