Shumë njerëz u plagosën dhe disa raportohen të vdekur pasi një person i armatosur hapi zjarr brenda një supermarketi Buffalo.
BUFFALO, SHBA – Një burrë ka hapur zjarr në një supermarket në Buffalo, Nju Jork, ndërsa transmetonte drejtpërdrejt në Twitch, duke vrarë shumë njerëz dhe duke plagosur të tjerë, thonë zyrtarët lokalë dhe dëshmitarët. Ai postoi gjithashtu një manifest në internet në të cilin e përshkroi veten si supremacist të bardhë.
Incidenti filloi të shtunën herët pasdite, ora amerikane, kur oficerët u njoftuan për një person që po qëllonte në Tops Markets në 1275 Jefferson Avenue. Pas mbërritjes, ata gjetën viktima në tokë jashtë supermarketit dhe të tjerë brenda ndërtesës, raporton noa.al duke cituar AP.
Sipas BNO News, shumë prej viktimave janë qëlluar me plumb në kokë. Tetë të vdekur janë konfirmuar zyrtarisht dhe disa të tjerë janë plagosur.
Një manifest në internet prej 106 faqesh, që besohet se është ngarkuar nga sulmuesi, përshkruan motivin e tij për sulmin e së shtunës. Në dokument, ai e përshkruan veten si një djalë 18-vjeçar dhe i vetë-përshkruar supremacist i bardhë dhe antisemit.
“Nëse ka një gjë që dua që ju të kuptoni nga këto shkrime, është se lindshmëria e të bardhëve duhet të ndryshojë. Popullsia e bardhë çdo ditë bëhet më e vogël në numër”, thuhet në dokument.
“Për të mbajtur një popullsi, njerëzit duhet të arrijnë një normë lindjeje që arrin nivelet e fertilitetit zëvendësues, ku në botën perëndimore është rreth 2,06 lindje për grua.”
