Gjashtë persona kanë pësuar lëndime trupore pasi janë goditur me thikë sot në një park në Annecy të Francës.
Në mesin e të plagosurve janë katër fëmijë, të cilët janë në gjendje të rëndë shëndetësore.
I dyshuari, një refugjat sirian 46 vjeçar, u qëllua në këmbë nga policia për t’u neutralizuar, dhe më pas u arrestua.
Presidenti francez, Emmanuel Macron, e quajti rastin “sulm frikacak” duke thënë se Franca është e tronditur.
“Kombi është i tronditur. Lutjet tona janë me viktimat si dhe me familjet e tyre dhe shërbimet e urgjencës,” shkroi ai në Twitter.
Në mesin e fëmijëve të lënduar është edhe një britanez, për të cilin konsullorët britanikë në Francë po udhëtojnë drejt Annecy për të ndihmuar familjen e tij.
Sekretari i Jashtëm britanik, James Cleverly tha se qeveria britanike është e gatshme të mbështesë autoritetet franceze.
“Dhe sigurisht ne qëndrojmë në solidaritet të fortë me popullin francez në këtë kohë të tmerrshme”, shtoi ai.
