Futbollisti Egzon Sinani bëhet me klub të ri.
Është Klubi i Futbollit Prishtina që ka njoftuar se ka transferuar qendërmbrojtësin me përvojë 29-vjeçar.
Ish-futbollisti i Llapit, Ballkanit dhe së fundi Gjilanit, ka pranuar të bëhet pjesë e klubit dhe menjëherë do t’i bashkëngjitet skuadrës në Pogradec.
Ai vjen nga përfundimi i kontratës nga skuadra e Gjilanit, i cili marrëveshjen e ka pasur deri në përfundimin e garave evropiane.
Ai u shpreh se nuk e ka pasur të vështgirë t’i bashkohet skuadrës më të trofeshme në Kosovë.
“Prishtina është klubi më i trofeshëm, me kushtet më të mira dhe nuk e pata të vështirë të pranoja ofertën për t’u veshur “bardhekaltër”, pavarësisht se viteve të kaluara nuk ishin krijuar kushtet dhe rrethanat që më herët t’i bashkohesha skuadrës”, u shpreh Sinani për faqen zyrtare të klubit të Prishtinës.
“Besoj shumë, se minimumi i minimumit të synimit do të jetë pjesëmarrja në garat ndërkombëtare. Por, duke e parë ekipin nga afër se çfarë disponon, jam i bindur që do të ndjekim edhe titullin”.
“Kemi grup jashtëzakonisht të mirë futbollistësh, por më së shumti më gëzon fakti që shumica e futbollistëve janë të rinj dhe po shoh shumë entuziazëm të madh në grup”.
