Ministrat e Punëve të Jashtme të Maqedonisë së Veriut dhe Shqipërisë, Bujar Osmani dhe Olta Xhaçka, sot i kanë bërë thirrje Serbisë dhe Kosovës që të zbatojnë pa vonesë marrëveshjen e arritur në Ohër, transmeton Gazeta Papirus.
Osmani, në konferencën e përbashkët për media me Xhaçkën, tha se në Ohër është biseduar për marrëveshjen e arritur së fundmi ndërmjet Kosovës dhe Serbisë dhe se janë pajtuar që marrëveshja ekziston dhe se të dyja palët duhet ta zbatojnë pa vonesë, në të cilën mund të llogarisin në mbështetje dhe ndihmë.
“Ata janë fqinjët tanë dhe ne mirëpresim çdo përparim që do të thotë stabilitet dhe prosperitet për të gjithë rajonin.” Pavarësisht nga interpretimet e ndryshme se çfarë është rënë dakord dhe çfarë duhet të zbatohet, ne u pajtuam që marrëveshja ekziston dhe që palët ta zbatojnë pa vonesë, në të cilën do të kenë mbështetjen dhe gatishmërinë tonë të plotë për t’i ndihmuar”, tha Osmani.
Shkupi dhe Tirana, siç theksoi ai, konsiderojnë se është jashtëzakonisht e rëndësishme që kjo marrëveshje, në përputhje me parimet dhe elementet themelore të saj, të jetë gjithëpërfshirëse dhe që në një moment të rezultojë me njohje reciproke.
“I gjithë rajoni, të gjashtë vendet e Ballkanit Perëndimor, duhet të kenë një perspektivë të qartë evropiane, ku do të arrijnë integrimin e tyre thelbësor dhe kjo nuk mund të realizohet me çështje të hapura dhe të pazgjidhura”, tha shefi i diplomacisë së Maqedonisë së Veriut.
Ministri shqiptar për Evropën dhe Punët e Jashtme Xhaçka ka thënë se kanë mirëpritur marrëveshjen e 18 marsit në Ohër me aneksin për normalizimin e marrëdhënieve ndërmjet Kosovës dhe Serbisë, shkruan Danas.
“Ne mendojmë se kjo marrëveshje do të përmirësojë perspektivën euroatlantike të rajonit të Ballkanit (Perëndimor) dhe mbështesim angazhimin e BE-së dhe SHBA-së dhe zbatimin e Aneksit, i cili është pjesë integrale e marrëveshjes për normalizimin e marrëdhënieve. “, tha Olta Xhaçka, e cila sot ndodhet për një vizitë zyrtare në Maqedoninë e Veriut./Gazeta Papirus/
