Konfliktet në familjet kosovare, shpeshherë përfundojnë me kanosje serioze e përleshje fizike, duke u dashur kështu intervenimi i Policisë. Përveç rasteve të dhunës mes çifteve, jo rrallëherë përfshihen në raste të tilla edhe anëtarët e tjerë të familjes.
Kështu ka ndodhur së fundmi në një familje në Pejë, ku një person po dyshohet se ka ushtruar dhunë ndaj familjarëve të tij.
Burimet brenda Prokurorisë kanë bërë me dije se rasti është denoncuar nga motra e të dyshuarit, e cila deklaroi se vëllai i saj – i cili është përdorues i substancave narkotike, po ushtron dhunë psikike ndaj tyre e madje edhe po i kërcënon.
Bazuar në dëshminë e saj, i dyshuari i ka kanosur edhe me thikë, duke iu shkaktuar shqetësim e frikë.
Si rezultat i denoncimit, Policia ka dalë në vendin e ngjarjes, ku është arrestuar i dyshuari dhe më pas është shoqëruar në stacion.
I njëjti është intervistuar nga hetuesit policorë dhe pas përfundimit të procedurave, me urdhër të prokurorit është dërguar në mbajtje për kryerjen e veprës penale ‘Dhuna në familje’.
