Ish-ministri i Punëve të Jashtme, thotë se reagimi i sërishëm i QUINT-it për qeverinë e Kosovës që ta zbatojë vendimin e Kushtetueses për Manastirin e Deçanit është parakusht për integrim në Këshillin e Evropës, NATO dhe mekanizmat tjerë ndërkombëtarë.
Kryeshefi ekzekutiv i MCC-së në Kosovë thotë se QUINT-i ka dërguar mesazh të fortë që është kërkesë e kahmotshme e tyre raporton Gazeta Express.
“Mënyra se si po e lexoj, dhe më besoni është e vetmja mënyrë për ta lexuar – aleatët tonë kyçë dhe të pazëvendësueshëm po thonë se zbatimi i vendimit përfundimtar të gjykatës së vitit 2016 për manastirin e Deçanit është “parakusht” për integrim në Këshillin e Evropës, NATO, etj. Një mesazh i fortë por që është kërkesë e kahmotshme”, ka shkruar Selimi.
Shtetet e QUINT’it me një deklaratë të përbashkët i kanë kërkuar Qeverisë së Kosovës që të zbatojë vendimin e Gjykatës Kushtetuese në lidhje me tokën e Manastirit të Deçanit.
“Në maj të vitit 2016, Gjykata Kushtetuese e Kosovës vërtetoi pronësinë e Manastirit të Deçanit mbi disa hektarë tokë. Përkundër këtij vendimi të ligjshëm dhe kërkesave pasuese, vendimi i Gjykatës ende nuk është zbatuar”, thuhet në reagimin e tyre.
