Në kryeqytetin e Azerbajxhanit, Baku, po bëhen përgatitjet për Kampionatin Botëror në Formula 1, raporton AA.
Përpara etapave që do mbahen më 30 prill për garën që do të organizohet nga Azerbajxhani për herë të 7-të, rrugët janë mbyllur për automjetet dhe këmbësorët dhe janë shndërruar në pistë.
Në rrugët e garës dhe ato përreth janë rritur masat e sigurisë dhe zonat që do përdoren si pistë janë rrethuar me barriera. Po ashtu janë ngritur tribuna përpara strukturave historike dhe kulturore si sheshet Azadlık dhe Azneft, Kulla Maiden dhe portat e kalasë në rrugën që do të zhvillohet gara.
Startimi i “Azerbaijan Grand Prix”, do të nis nga sheshi Azadlık. Automjetet do të kalojnë nga rruga në breg të Detit Kaspik, do të vazhdojnë xhirot përreth zonës historike İçerişehir (Qyteti i vjetër-Qyteti i brendshëm) dhe do të mbërrijnë sërish në vijën e finishit në sheshin Azadlık.
Pilotët e F1 do të përshkojnë një distancë prej rreth 6 kilometra në një xhiro dhe do të zhvillojnë 51 xhiro në pistën ku ndodhen 20 kthesa të vështira.
Të apasionuarit pas shpejtësisë, krahas garave do të kenë mundësi të marrin pjesë edhe në aktivitete të ndryshme argëtuese.
Xhirot stërvitore të garës do të mbahen nesër ndërsa xhirot e renditjes të shtunën më 29 prill.
– Të gjitha biletat janë shitur
Sipas informacioneve që ka siguruar gazetari i AA-së, janë shitur të gjitha biletat e tribunës për “Azerbaijan Grand Prix”.
Krahas ndjekësve lokalë në Baku do të jenë të pranishëm për të ndjekur garat edhe të apasionuar pas shpejtësisë nga më shumë se 100 vende.
Azerbajxhani i cili në vitet e mëparshme ka organizuar 6 herë Kampionatin Botëror në Formula 1, po zhvillon negociata me zyrtarët e Formula 1 që kampionati të mbahet edhe për një kohë në Baku.
