Komuna e Prishtinës ka mbetur pa automjete, njofton kryetari i saj Përparim Rama.
Ai ka thënë se “kontrata e lidhur nga Autoriteti Qendror i Prokurimit, që vepron nën Ministrinë e Financave ka skaduar me 6 dhjetor”.
Si shkak i kësaj, komuna nuk ka automjete për të kryer punët operacionale.
“Pas skadimit të kontratës, të gjitha veturat janë kthyer, duke lënë Komunën e Prishtinës pa automjete funksionale. Kjo ka vështirësuar ndjeshëm operimin e drejtorive si Inspeksioni dhe Drejtoria për Siguri dhe Emergjenca”, shkruan Rama.
Ky i fundit e fajëson Qeverinë për këtë çështje, dhe kërkon që gjithçka të zgjidhet sa më shpejt.
Kontrata e lidhur nga Autoriteti Qendror i Prokurimit, që vepron nën Ministrinë e Financave ka skaduar me 6 dhjetor. Kjo kontratë përfshinte institucione qendrore dhe lokale, përfshirë Komunën e Prishtinës, e cila kishte marrë me qira 76 vetura.
Pas skadimit të kontratës, të gjitha veturat janë kthyer, duke lënë Komunën e Prishtinës pa automjete funksionale. Kjo ka vështirësuar ndjeshëm operimin e drejtorive si Inspeksioni dhe Drejtoria për Siguri dhe Emergjenca.
Komuna i bën thirrje urgjente Qeverisë së Kosovës që të gjejë zgjidhje, përgjegjësi kjo e AQP-së. Mosveprimi i tyre po pengon rëndë funksionimin e komunave dhe institucioneve publike!
Kryeqyteti mbetet i angazhuar për të përmbushur detyrimet ndaj qytetarëve, por mungesa e mjeteve për operim përbën rrezik për shërbimet dhe sigurinë publike.
Trajtimi i interesit publik kërkon prioritet”, thuhet në postimin e kryetarit të kryeqytetit.
