Lulzim Hetemi tash e më shumë se 48 orë është i bllokuar në objektin e komunës së Leposaviqit.
Kontakti me Lulzimin është i pamundur, pasi Nacionale ka provuar disa herë.
Por, vëllai i tij në një prononcim për Albanian Post, ka thënë se pas bisedës me Lulzimin, gjendja e tij është e mirë.
“Ai është mirë. Që kur ka hy në komunë nuk e kemi takuar por kemi biseduar me të përmes telefonit. I kemi shkruar na ka kthyer përgjigje. Mirë është”.
“Kemi për të ngrënë e për të pirë, mirë jemi – më tha, se unë e pyeta a ka nevojë me të sjellë diçka deri te policia së paku. Por nuk deshi, jo tha se edhe nuk ju lënë, por nuk kemi nevojë të gjitha i kemi, dhe siç e kuptova unë ai nuk po do që të dalë”, ka treguar Driton Hetemi, për Albanian Post.
“Tash, ai nuk më tha që ‘nuk po dua të dal’, por sa e kuptova unë. Unë e pyeta – a nuk po mundeni me dalë apo nuk po doni? Më tha – jo mirë është gjendja kemi për të ngrënë e për të pirë, qysh me lëshu tash?”, tregon Hetemi.
“Unë e njoh Leposaviqin, pjesën te komuna e krejt dhe e di që kanë mundësi me dalë por thjeshtë nuk po duan”.
Driton Hetemi tregoi se Lulzimi nuk është i vetëm në komunë, “është edhe dikush aty, edhe policia”.
“Mua mu duk në disponim të mirë, me shëndet është mirë, pastaj ata protestuesit nuk rrinë gjithmonë aty, dhe ai mund të dalë po të dojë, nuk është i bllokuar, por nuk do”, përsëriti Dritoni.
