Gjatë ditës së djeshme, mediet serbe raportuan se në fshatin Suhodoll ishte shkruar akronimi i Ushtrisë Çlirimtare të Kosovës (UÇK) dhe një figurë që shenjonte zemrën/dashurinë. Por, kjo sipas Policisë së Kosovës është konsideruar përçarëse raporton Kossev.
Raportimi i gjithë kësaj buroi nga famëkeqja dhe e ashtuquajtura Zyra për Kosovën dhe Metohinë, që dikur drejtohej nga Alleksandër Vullini e tash drejtohet nga Petar Petkoviqi.
UÇK-ja me zemër u shkrua në murin e një klinike, dhe kjo u interpretua si mesazh “kërcënues” nga kjo e ashtuquajtur zyre.
“Kjo klinikë është shënjestër e shpeshtë e sulmeve të vandalëve shqiptarë dhe në vitet e kaluara është goditur me gurë, janë thyer xhamat dhe janë shkruar mbishkrime anti-serbe,” – vazhdoi zyra.
Por, çudia u rrit sot për këtë grafit pasi reagoi edhe Policia e Kosovës.
Policia jonë ka deklaruar se grafiti përmbante “përmbajtje përçarëse”.
Në një raportim të kategorizuar si “incident kriminal” dërguar edhe në medie, aty thuhet se persona të dyshuar e të panjohur kanë shkruar “grafit me mbishkrime me përmbajtje përçarëse në muret e QKMF-së dhe në tabelat treguese të fshatit. Rasti është duke u hetuar.”
Se si mund të cilësohet përmbajtje përçarëse mbishkrimi UÇK me zemër është ende e paqartë. Ushtria Çlirimtare e Kosovës kishte bërë luftë të drejtë joetnike kundër regjimit të Millosheviqit që po kryente represion e dhunë të paparë në vendin tonë gjatë viteve ’90.
Qysh kishin raportuar mediet serbe?
Në fakt, raportimi i medieve serbe – ashtu si edhe i së ashtuquajturës Zyre për Kosovën dhe Metohinë në Serbi – kishte përmbajtje të qartë përçarëse.
Alo – medium i afërt me regjimin e Vuçiqit – dje e botoi një artikull për këtë ngjarje të titulluar: “Për të gjithë është e qartë kush shkakton provokime dhe konflikti. Zyra për Kosovë e Metohi: Qëllimi është persekutimi i serbëve”.
Urrejtje nxiti edhe mediumi tjetër i afërt me regjimin, Informer, që e botoi një artikull të ngjashëm me të njëjtin titull përçarës. Asnjëri prej mediumeve nuk ka vënë në dyshim deklaratat e të ashtuquajturës Zyre për Kosovën dhe Metohinë, që përmbanin pretendime të rënda përfshirë edhe ato që ky rast tregonte se si shqiptarët tentonin t’i përndiqnin etnikisht serbët.
Nacionale ka dërguar pyetje në Policinë e Kosovës për ta kuptuar se për çfarë arsyesh e kishin cilësuar grafitin pro-UÇK si “përmbajtje përçarëse”.
Kujtojmë se personi/at që mund të kapen për këtë rast mund të përballen me akuza të rënda kriminale
