Policia e Kosovës ka bërë të ditur se është arrestuar një shtetas serb në Jarinjë, pasi i njëjti ka sulmuar zyrtarin policor.
Në njoftimin e Policisë thuhet se deri te sulmi ka ardhur, pasi shtetasi serb u refuzua të hynte në territorin e Kosovës, pasi nuk posedonte dokumentacion, njofton Klankosova.tv.
Polici i lënduar është dërguar për tretman mjekësor, teksa ndaj të dyshuarit është iniciuar rasti ‘sulm ndaj personit zyrtar’ dhe me aktvendim nga prokurori i njëjti dërgohet në mbajtje deri në 48 orë.
“Në Pikën e Kalimit Kufitar në Jarinje, sot më 07.04.2023, rreth orës 16:30, në hyrje për në Republikën e Kosovës, ka ardhur një shtetas i Serbisë, i cili nuk posedonte dokumentacionin e nevojshëm për të hyrë në Republikën e Kosovës|”, thuhet në njoftim.
“Pas refuzimit për hyrjes në vendin tonë, i dyshuari N.T., (viti i lindjes 1981, shtetas serb i Serbisë) ka filluar të fyej zyrtarët policorë që ishin në detyrë zyrtare në Pikën e Kalimit Kufitar”.
“Të dyshuarit i është kërkuar nënshkrimi i dokumentit/vendimit për refuzim të hyrjes në vendin tonë. Ai nuk ka pranuar të nënshkruaj atë vendim dhe ka sulmuar njërin nga zyrtarët policor të cilit i ka shkaktuar lëndime trupore. Polici i lënduar është dërguar për tretman mjekësor”.
