Partia Demokratike e Kosovës ka vazhduar me parafushatën zgjedhore në Gjermani, kësaj radhe deputetët e kësaj partie Enver Hoxhaj dhe Elmi Reçica nga Berlini kanë njoftuar se është formuar edhe një degë në shtetin gjerman.
Reçica në postimin e tij në rrjetin social “Facebook”, u shpreh se mbështetja e madhe që po vjen nga mërgata për Bedri Hamzën.
“PDK edhe në Berlin – fillon puna për organizmin e kuvendit zgjedhor për degën e gjashtë të PDK-së në Gjermani.
Sot në Berlin, në një takim të përbashkët me shumë veprimtarë dhe afaristë u formua Këshilli për Organizimin e Kuvendit Zgjedhor për degën e gjashtë të PDK-së në Gjermani, e cila do ta përfshijë Berlinin, Brandenburgun, Sachsen Anhalt dhe Sachsen. Kryetar i Këshillit u zgjodh Arton Rekaliu, nënkryetare Drita Avdiu si dhe kryesia prej 11 anëntarësh.
Me formimin e këtij Këshilli, ne si Komision për Organizimin e PDK-së në Mërgatë po e realizojmë edhe njërin ndër targetet tona kryesore – strukturimin e Partisë Demokratike të Kosovës në të gjithë Gjermaninë.
Mbështetja e madhe që po vjen nga mërgata për Bedri Hamzën, tregon se bashkatdhetarët tanë po kërkojnë më shumë, po duan #mëmirë, po e duan Bedri Hamzën për kryeministër”, thuhet në postimin e plot të deputetit Reçica.
