Papa Françesku u kërkoi hungarezëve të hapin dyert për të tjerët me një lutje për t’i dhënë fund luftës së Rusisë në Ukrainë, derisa përfundoi vizitën në vend.
Papa shprehu vlerësimin për Hungarinë për mirëseardhjen e refugjatëve ukrainas, teksa foli me turmën në brigjet e Danubit.
Por ai sfidoi politikat e vijës së ashpër të kryeministrit të vendit Viktor Orban kundër imigracionit, e cila në 2015-16 përfshinte ndërtimin e një gardhi me tela në kufirin me Serbinë për të ndaluar njerëzit të hynin.
“Sa e trishtueshme dhe e dhimbshme është të shohësh dyer të mbyllura. Dyert e mbyllura të egoizmit tonë në lidhje me të tjerët, dyert e mbyllura të individualizmit tonë mes një shoqërie izolimi në rritje, dyert e mbyllura të indiferencës sonë ndaj të paprivilegjuarve dhe atyre që vuajnë, dyert që mbyllim ndaj atyre që janë të huaj ose të ndryshëm nga ne, ndaj emigrantëve apo të varfërve”, u shpreh Papa Françesku.
86-vjeçari është përpjekur të krijojë një akt balancues diplomatik në lutjet e tij për t’i dhënë fund luftës, duke shprehur solidaritet me Ukrainën duke mbajtur derën e hapur për dialogun me Moskën.
