Drejtoria për Hetimin e Krimeve Ekonomike dhe Korrupsionit (DHKEK), konkretisht Sektori për Hetime Financiare në Policinë e Kosovës, pas ndërmarrjes se veprimeve hetimore dhe në koordinim me Prokurorinë Themelore në Prizren me datë 22.08.2023 ka arrestuar dy persona të dyshuar me iniciale E.SH dhe B.K. për shkak se dyshohet se të njëjtit kanë keqpërdorur detyrën zyrtare me qellim të përfitimit të kundërligjshëm për vete apo persona te tjerë.
Të njëjtit, sipas PK-së, në cilësi të personave zyrtarë kanë qenë te caktuar për menaxhim dhe mbikëqyrje të kontratës për ndërtimin e disa rrugëve në një fshat të komunës së Suharekës në vitin 2022, ku vlera e kësaj kontrate ka qenë dhjetëra mijë euro.
“Pas daljes së prokurorit në vendngjarje dhe ekspertëve kompetentë dhe verifikimit të gjendjes faktike, si dhe intervistimit të dëshmitarëve lidhur me ketë kontratë, është konstatuar se e njëjta nuk është realizuar siç ka qenë e paraparë. Të dyshuarit kanë përpiluar procesverbaleve dhe situacione fiktive/rrejshme ku kanë konfirmuar kryerjen e punimeve sipas kontratës, ndërsa sipas gjendjes në terren, kjo kontratë nuk është realizuar”, ka thënë Policia.
Lidhur me rastin janë intervistuar të dyshuarit e lartcekur në prezencë të avokatit mbrojtës, ku pas përfundimit, sigurimit të provave dhe dëshmive, me vendim të prokurorit të dyshuarit janë dërguar në mbajtje për 48 orë.
