Kryetari i PDK-së për Zvicër dhe Sekretari i Përgjithshëm i kësaj dege në Zvicër, Ragip Xhaka dhe Shaip Kadriaj, bashkë me kryetarin e Drenasit, Ramiz Lladrovcin, kanë vizituar sot babain e Hashim Thaçit në Burojë.
“Baca Haxhi përkundër viteve që bart në shpatullat e tij, bart edhe brengën e padrejtësisë, brengën e Kosovës, brengën e vendimit për luftën e UÇK-së, për fatin e birit të tij, Hashimit dhe të tjerëve, heronj të luftës dhe paqes”, ka shkruar Lladrovci.
Postimi i plotë:
Kur jam dëgjuar me mikun tim Ragipin se do të jetë në Kosovë, e para që më ka thënë ishte se do të dëshironte ta vizitojmë bashkë Haxhi Thaçin në Burojë, Babën e ish presidentit Thaçi.
Sot, me kryetarin e Degës së PDK-së në Zvicër, Ragip Xhakën dhe Sekretarin e Përgjithshëm, Shaip Kadriaj dhe shokë, shkuam për vizitë te Baca Haxhi në Burojë ku na priti sipas traditës, në odë.
Baca Haxhi përkundër viteve që bart në shpatullat e tij, bart edhe brengën e padrejtësisë, brengën e Kosovës, brengën e vendimit për luftën e UÇK-së, për fatin e birit të tij, Hashimit dhe të tjerëve, heronj të luftës dhe paqes.
Mërgata ka qenë fuqia jonë morale, ushtarake e financiare për çlirim, me bijat e bijtë më të mirë që rreshtoheshin në UÇK dhe ishin gati të flijoheshin për lirinë e Kosovës. Sot, mërgata është burim i mirëqenies së shumë familjeve.
Ragipi dhe Shaipi theksuan se mërgata i ndjen zhvillimet në atdhe, vuajtjet dhe padrejtësitë që shkaktohen, në veçanti nga një gjyq që synon të rishkruaj historinë.
Ata po ashtu, shprehën solidaritet me dhimbjen që i është shkaktuar Bacës Haxhi dhe të gjitha familjeve që i kanë më të dashurit në betejën e fundit për të vërtetën e UÇK-së dhe luftën e drejtë të saj.
