Komandanti i misionit të KFOR-it, gjeneralmajor Angelo Michele Ristuccia, po ndjek personalisht zhvillimin e situatës dhe shpreh solidaritetin e tij me ushtarët e NATO-s që u lënduan gjatë përleshjeve.
Ristuccia tha se Kosova dhe Serbia duhet të marrin përgjegjësinë e plotë për atë që po ndodh në veri, në vend që, sipas tij, të fshihen pas narrativave të rreme.
“Për të shmangur përleshjet ndërmjet palëve dhe për të minimizuar rrezikun e pas përshkallëzimit, paqeruajtësit e KFOR-it parandaluan kërcënimet ndaj jetës së serbëve dhe shqiptarëve të Kosovës. Të dyja palët duhet të marrin përgjegjësinë e plotë për atë që ndodhi dhe të parandalojnë çdo përshkallëzim të mëtejshëm, në vend që të fshihen pas narrativave të rreme”, ka thënë Ristuccia.
KFOR-i bëri të ditur më herët se 30 ushtarë të vet mbetën të lënduar nga përleshja e djeshme me protestuesit serbë.
Përndryshe rreth situatës së tensionuar në veri kanë reaguar edhe nga EULEX.
Ka qenë pikërisht Shefi i Misionit të EULEX-it, Lars-Gunnar Wigemark, ai i cili ka reaguar për zhvillimet e shkaktuara nga protestat në komunat veriore të vendit.
Ai ka deklaruar se i dënon sulmet e pakuptimpta dhe të paprovokuara ndaj pjesëtarëve të KFOR-it, dhe u uron ushtarëve të plagosur shërim të shpejtë.
“KFOR-i është partneri kryesor i sigurisë së EULEX-it së bashku me Policinë e Kosovës. Ne koordinohemi dhe stërvitemi së bashku. Sot sundimi i ligjit u shkel në Kosovë!”, ka shkruar Wigemark në Twitter.
