Sot në veri të Kosovës janë kidnapuar tre zyrtarë policorë nga ana e Serbisë. Deri më tani, ende nuk ka pasur ndonjë reagim nga faktori ndërkombëtar. Reagimi i parë në lidhje me këtë temë ka ardhur nga Bashkimi Evropian, që e lehtëson dialogun mes Kosovës dhe Serbisë.
Në një prononcim për Express, Peter Stano, zëdhënës i Bashkimit Evropian, ka deklaruar se janë në kontakt me palët e përfshira, pra me Kosovën, Serbinë dhe KFOR-in, për të kuptuar se çfarë ka ndodhur saktësisht.
“Ne jemi – si çështje urgjente – në kontakt me të dyja palët, si dhe me KFOR-in, për të përcaktuar se çfarë dhe si ka ndodhur saktësisht.” – deklaroi ai.
Tutje, BE-ja ka bërë thirrje që Kosova dhe Serbia të përbahen nga çdo veprim që mund të kontribuojë më tej në ngritjen e tensioneve.
“Ne i bëjmë thirrje Kosovës dhe Serbisë që të përmbahen nga çdo veprim apo reagim që mund të kontribuojë më tej në ngritjen e tensioneve. Ne përsërisim thirrjen e BE-së për de-përshkallëzimin e menjëhershëm dhe vendimtar.” – ka deklaruar Stano.
Për dallim nga BE-ja, shtetet e QUINT-it, pra ShBA-ja, Gjermania, Franca, Anglia e Italia nuk kanë shkruar ende asnjë shkronjë në lidhje me këtë çështje. Edhe Departamenti i Shtetit i ShBA-së ka heshtur deri tani, siç pa zë janë edhe shtetet e rajonit, si Shqipëria.
Por kryeministri Albin Kurti, përmes një statusi, u ka kërkuar ndërkombëtarëve të reagojnë në lidhje me këtë temë.
“Kërkojmë lirimin e menjëhershëm të tre zyrtarëve të rrëmbyer policor dhe ftojmë faktorët ndërkombëtarë që të dënojnë këtë akt agresioni të Serbisë.” – shkroi ndër të tjera Kurti.
Në një linjë me Kurtin, ishte edhe presidentja Vjosa Osmani, e cila kërkoi reagim të ashpër dhe veprim të unifikuar të komunitetit ndërkombëtar.
“Policia e Kosovës ka treguar përkushtim e vendosmëri për ta ruajtur rendin dhe ligjin për të gjithë qytetarët pa dallim, ndaj një akt i tillë kërkon një reagim të ashpër dhe veprim të unifikuar të komunitetit ndërkombëtar ndaj tendencës së Serbisë për destabilizim të rajonit.” – shtoi ai.
Ndërsa, kryekuvendari Glauk Konjufca deklaroi se lirimi i menjëhershëm i tre policëve të Kosovës është ultimativ.
“Në kohën kur qeveria e Kosovës po del me propozime për t’i gjetur zgjidhje destabilizimit të shkaktuar nga grupet kriminale të mbështetura nga Beogradi, Serbia dëshmon nuk është e gatshme për asnjë zgjidhje. Prandaj, i kërkojmë fuqishëm faktorit ndërkombëtar, veçanërisht BE-së dhe SHBA-së që ta dënojnë Serbinë për këto akte agresioni kundrejt Kosovës. Lirimi i menjëhershëm i tre policëve të Kosovës është ultimativ.” – ka shkruar ai.
