Kryetari i Sindikatës së Bashkuar të Arsimit dhe Shkencës, Rrahman Jasharaj, ka ironizuar me kryeministrin Albin Kurti dhe Ministren e Arsimit, Arbërie Nagavci, për tubimet zgjedhore.
Për Kryeministrin Kurti, Jasharaj ka thënë se po bërtet shumë dhe se deri në fund të fushatës është rrezik të mbetet krejt pa zë.
“Njeriu bërtet shumë vetëm atëherë kur është i mllefosur e nervoz dhe ju e dini pse jeni. Ti vazhdo me bërtimat, por unë po ta kujtoj se po ta dëgjoje për këto katër vite të Qeverisjes zërin tonë , pra të punëtorëve arsimorë, të policëve, administratës, zjarrfikësve , pensionistëve dhe qytetarëve plot halle, atëherë do ta ruaje zërin tënd në fushatë sepse në mënyrë të qetë e pa nervozë do të numëroje plotësimin e kërkesave legjitime të punëtorëve në sektorin publik dhe do të flisje edhe për arritjet në gjithë sferat e jetës, por në mungesë të kësaj ti s’ke çka bën tjetër përveç se të bërtasish”, thuhet në reagim.
E për Nagavcin, Jasharaj ka thënë se nga frika se nuk do zgjidhet minister, deshi të provojë “mos po merr popullaritet si këngëtare”.
“Ti Kryeministër është mirë t’i thuash dikujt nga partia të të zëvendësoj bile në dy a tri tubime se kështu si po bërtet do të mbetesh krejt pa zë në gjysmë të fushatës se janë edhe do ditë deri të dita e zgjedhjeve. Por, ta kuptoj hallin se ndoshta edhe nuk ke kujt t’ia besosh këtë detyrë se ata ose do të mundohen të të kopjojnë e të bërtasin , ose të nisin e të këndojnë siç bëri ministrja Nagavci. Ajo, mbase duke u frikësuar se ministre nuk do të zgjidhet kurrë më, ka dashur të provojë se mos po merr popullaritet si këngëtare”, thuhet në reagimin e Jasharajt
