Për më shumë se dy orë sot, Ministrja e Industrisë, Ndërmarrësisë dhe Tregtisë, Rozeta Hajdari, është intervistuar në Prokurorinë Speciale të Kosovës, nën dyshimet se e njëjta ka keqpërdorur pozitën zyrtare, shkruan Gazeta Metro.
Megjithatë, ministrja Hajdari, pas përfundimit të intervistimit, para mediave, çuditërisht deklaroi se ajo s’është intervistuar.
“Nuk jam intervistuar sot, sepse, është fjala për intervistë për rezervën shtetërore e cila kërkon çartësi në legjislacionin në fuqi, që është Ligji për Rezervën Shtetërore, Ligji për Mbrojtjen e Informacionit të Klasifikuar dhe ligjet tjera, prandaj deri sa ti marrim qartësitë përkatëse ne do ti marrim qartësitë përkatëse, ne do të bëjmë kërkesën dhe të ju japim përgjigjet që kanë nevoj ti marrim“, ka deklaruar ajo.
Por, ndryshe është deklaruar vetë Prokuroria Speciale, e cila nëpërmjet një komunikate për media e ka konfirmuar se ministrja është intervistuar në fakt, nën cilësinë e të pandehurës, nën dyshimet se ka kryer veprën penale “‘’Keqpërdorim i pozitës apo autoritetit zyrtar”
“NJOFTIM NGA PROKURORIA SPECIALE
Prishtinë, 15 prill 2024 – Pas interesimit të madh të mediave, Prokuroria Speciale, njofton opinionin publik se, sipas ftesës së kësaj prokurorie, Rozeta Hajdari, Ministre në Ministrinë e Industrisë, Ndërmarrësisë dhe Tregtisë, është paraqitur në Prokurorinë Speciale për t’u intervistuar në cilësinë e të pandehurës, nën dyshimin se ka kryer veprën penale ‘’Keqpërdorim i pozitës apo autoritetit zyrtar’’, nga neni 414 i Kodit Penal të Republikës së Kosovës, lidhur me rezervat shtetërore. Mirëpo, e njëjta sot nuk është deklaruar, dhe siç e parasheh Kodi i Procedurës Penale ka shfrytëzuar të drejtën për tu mbrojtur në heshtje”, është njoftuar nga Prokuroria.
