Kur Qeveria Kurti është në fund të mandatit, njëra nga çështjet më të rëndësishme po konsiderohet punësimi. Me 238 konkurse të shpallura vetëm në muajin mars, ministritë e Qeverisë së Kosovës po sigurohen që vendet e lira të mos mbeten bosh, transmeton Gazeta Papirus.
Muaji mars mund të konsiderohet i begatë për hapjen e konkurseve në Qeverinë e Kosovës për të rekrutuar zyrtarët nëpër pozita që janë të lira. Kur kanë mbetur edhe më pak se dy javë deri në mbajtjen e seancës konstituive të Kuvendit – me shpresë që të formohet edhe Qeveria – shumica e ministrive që drejtohen nga Vetëvendosje dhe Guxo kanë hapur qindra konkurse.
Qeveria që drejtohet nga Albin Kurti vetëm në muajin mars i ka shpallur 238 konkurse për të rekrutuar staf nëpër ministri.
- Ministria e Financave
Ministria i Financave, Punës dhe Transfereve, Hekuran Murati, mban rekordin për hapjen e konkurseve në Qeveri. Në muajin mars, ministria që drejtohet nga Murati ka shpallur 97 konkurse. Ministrisë së Financave, Punës dhe Transfereve nuk i kanë mjaftuar katër vite mandat për të rekrutuar inspektorë, zyrtarë të lartë, udhëheqës divizionesh e drejtorë. Në fund, para se ta lërë karrigen e ministrit, Murati i ka shpallur 97 konkurse.
- Ministria e Bujqësisë, Pylltarisë dhe Zhvillimit Rural
Edhe Ministria e Bujqësisë, që drejtohet nga Faton Peci i partisë Guxo, ka shpallur konkurs për 27 pozita, që është edhe ministria e dytë pas asaj të Financave për numrin e konkurseve. Peci po kërkon Inspektor Sanitar, Drejtor të Institutit Bujqësor, Inspektor të Tokës Bujqësore e shumë pozita të tjera.
- Ministria e Punëve të Brendshme dhe Ministria e Industrisë, Ndërmarrësisë dhe Tregtisë
Ministria e Punëve të Brendshme dhe ajo e Industrisë dhe Tregtisë kanë shpallur nga 24 konkurse, në total 48 konkurse gjithsej kanë shpallur këto dy ministri. Ministrja që drejtohet nga Rozeta Hajdari ka vendosur që në fund të mandatit ta rekrutojë edhe sekretarin e ministrisë, i cili është zyrtari më i rëndësishëm në ministri në stafin civil.
Katër vite mandat Hajdarit nuk i kanë mjaftuar që ta nxjerrë një emër për sekretar, por disa herë ka hapur dhe ka anuluar konkurset për pozitën e ZKA (Zyrtarit Kryesor Administrativ). Edhe agjencitë që janë në kuadër të kësaj ministrie për katër vite i ka pasur me ushtrues detyre, ndërsa tani në mars ka shpallur konkurse për gjashtë agjenci. Ndërkohë, në Agjencinë e Akreditimit, Hajdari e ka rehatuar Irfan Lipovicën në pozitën e kryeshefit, i cili ishte arrestuar nën dyshimin për dallavere me rezervat shtetërore.
- Ministria e Drejtësisë
Edhe ministria që drejtohet nga Albulena Haxhiu, ajo e Drejtësisë, ka shpallur 24 konkurse vetëm në muajin mars të këtij viti, kur Qeveria është në detyrë. Ministria e drejtuar nga Haxhiu po kërkon udhëheqës divizionesh, zyrtar për buxhet, Drejtor të Departamentit Ligjor, zyrtar personeli etj.
- Ministria e Infrastrukturës
Më pak konkurse kanë shpallur Ministria e Infrastrukturës me 15, ajo e Ekonomisë me 13, e Mbrojtjes me 7 dhe ajo për Kthim me 7. Në total janë 238 pozita që i kanë shpallur ministritë e Qeverisë Kurti në fund të mandatit, para se t’i lirojnë pozitat drejtuese.
Kujtojmë se Lëvizja Vetëvendosje ka qenë partia më e zëshme sa ka qenë në opozitë, kur qeveritë e kaluara shpallnin konkurse në fund të mandatit. Këto konkurse kritikoheshin ashpër dhe konsideroheshin vepra korruptive.
