Kosova ka importuar shumë më shumë mallra nga Serbia sesa që ka eksportuar atje gjatë 2022-ës, raporton Front Online.
Bazuar në të dhënat e Agjencisë së Statistikave të Kosovës (ASK), në tre muajt e parë Kosova ka marrë produkte në vlerë mbi 70 milionë euro nga fqinji verior, derisa ka dërguar vetëm 9.1 milionë sosh.
Kosova importi produkte serbe në vlerë 16.3 milionë euro në janar, 24.6 në shkurt dhe 32.2 në mars.
Ndërsa eksportoi produkte në vlerë 2.7 milionë euro në janar, 2.5 në shkurt dhe 6.8 në mars.
Deficiti tregtar i Kosovës në raport me Serbinë, përgjatë këtyre tre muajve, është 60 milionë euro.
Situata është ndryshe tek marrëdhëniet ekonomike të Kosovës me Shqipërinë.
Kosova ka eksportuar 3.9 milionë në janar, derisa ka importuar 16.3 milionë euro.
Në shkurt, Kosova, në shtetin amë ka çuar produkte në shumë prej 5.7 milionë eurove. E ka sjell nga atje produkte në vlerë 18.3 milionë euro.
E vlera eksporteve të Kosovës gjatë marsit ishte 9.7 milionë eurove, e ajo e importeve 22 sosh.
Kur mbledhen krejt këto del se Kosova në tre mujorin e parë të 2022-ës ka eksportuar në total 19.3 milionë euro derisa ka importuar 56 milionë.
Për importin më të madh të Kosovës nga Serbia sesa nga Shqipëria kanë folur ekonomistët.
Mustafë Kadriaj këtë e lidh me të kaluarën e shteteve.
“Në aspektin ekonomik është e natyrshme për faktin se e kaluara e përbashkët në ish-Jugosllavi bën që konsumatori i Kosovës ta njeh dhe ka besueshmëri më shumë tek produktet serbe. Kjo që po e them ekziston në çdo logjikë të konsumatorit vendor”, deklaroi ai për “Front Online”.
Sipas tij është qytetari që mund ta bëjë dallimin në treg.
“Si shtet u provuam që me taksa dhe masa të reciprocitetit nuk mund t`ia dalim si rezultat i presionit ndërkombëtar. Të vetmin bojkot të produkteve me origjinë serbe mund ta bëjë konsumatori”, u shpreh ai
