Është ende e paqartë nëse helikopteri me të cilin udhëtonte presidenti i Iranit, Ebrahim Reisi është rrëzuar apo ka bërë ulje të detyruar për shkak të mjegullës së dendur në vendin ku ndodhej, rreth 600 kilometra larg Teheranit.
Mediat e huaja bëjnë me dije se Gjysmëhëna e Kuqe ka dërguar 40 ekipe të kërkim shpëtimit për të bërë të mundur gjetjen e Raisit.
Ministri i Brendshëm i Iranit, Ahmad Vahidi, tha se disa skuadra shpëtimi janë ende në kërkim të helikopterit.
“Gjërat janë nën kontroll dhe ekipet e shpëtimit po bëjnë punën e tyre. Shpresojmë që kjo të bëhet sa më shpejt,”– u shpreh Vahidi duke shtuar se “do të duhet kohë për të arritur në vendndodhjen e helikopterit për shkak të kushteve të këqija të motit”.
Mësohet se përveç presidentit, në bord ishin: Mohammad Ali Al Hashem, imam i Tabrizit; Hossein Amirabdollahian, Ministri i Jashtëm i Republikës Islamike; Malik Rahmati, guvernator i Azerbajxhanit Lindor; piloti, një bashkë-pilot, kreu i ekipit të mbrojtjes dhe një nga rojet.
