Kandidati për deputet nga Forumi Intelektual “Europa 2030” Artan Nimani, ka reaguar me anë të një shkrimi në faqën zyrtare “Facebook”, pas shpërthimit në kanalet e Ibër-Lepencit.
Nimani është shprehur se politikat e gabuara, po e rrezikojnë sigurinë e Kosovës.
“POLITIKAT E GABUARA PO RREZIKOJNËN SIGURINË E KOSOVËS”
“Shpërthimi i sotëm në kanalet e lumit Ibër-Lepencit si edhe ai në Komunen e Zubin Potokut dëshmon për mungesën e një qasjeje proaktive nga Qeveria e Kosovës në këtë pjesë delikate të vendit.
Situata kërkon një reagim të menjëhershëm dhe një strategji të koordinuar nga institucionet e sigurisë së Kosovës. Bashkëpunimi i ngushtë me KFOR-in dhe prezencën amerikane është i domosdoshëm për të garantuar sigurinë dhe për të parandaluar përshkallëzimin e mëtejshëm të situatës.
Naiviteti dhe mosnjohja e realitetit në terren nga zyrtarët politikë janë duke rrezikuar jo vetëm sigurinë publike, por edhe infrastrukturën strategjike të Kosovës. Këto ngjarje janë një paralajmërim i qartë për pasojat që sjellin politikat e papërgatitura dhe të papërshtatshme ndaj sfidave reale në veri të vendit.
Forumi Intelektual “Europa 2030” u bën thirrje institucioneve përgjegjëse që të përqendrohen në hartimin e një plani të qëndrueshëm për të garantuar sigurinë dhe stabilitetin në gjithë territorin e Kosovës. Çdo vonesë apo neglizhencë mund të sjellë pasoja të rënda për të ardhmen e vendit dhe për integritetin e tij strategjik”, tha Artan Nimani
