Ambasadori gjerman në Serbi, Thomas Schieb, ka thënë se çështja e pavarësisë së Kosovës nuk mund të krahasohet me situatën aktuale në Ukrainë, duke theksuar se NATO-ja vendosi të bombardojë ish-Jugosllavinë vetëm pasi ishin shterur të gjitha mjetet diplomatike, transmeton Gazeta Blic.
“Në Kosovë, shqiptarët etnikë ishin të shtypur dhe të përjashtuar nga jeta publike. Bashkësia ndërkombëtare zhvilloi negociata të gjata që nuk dhanë fryte, duke shteruar pa sukses të gjitha mjetet për zgjidhjen paqësore të konfliktit dhe parandalimin e katastrofës humanitare. NATO ka vendosur të sulmojë Jugosllavinë, por nuk ka indikacione apo prova në Ukrainë për shtypjen e supozuar të rusëve etnikë dhe mjetet diplomatike për t’i dhënë fund luftës në Donbas nuk janë shfrytëzuar. Kështu ka ndodhur në Kosovë, e cila ishte nën kujdesin dhe administrimin e misionit të UNMIK-ut që nga viti 1999”, tha Schieb.
Sipas tij, me vite është punuar intensivisht për të gjetur një zgjidhje për statusin e Kosovës që do të ishte e pranueshme për të dyja palët dhe se Kosova vetëm pas dështimit të këtyre përpjekjeve shpalli pavarësinë e saj në shkurt të vitit 2008.
“Ndarja e zonave separatiste të Donetsk dhe Lugansk, megjithatë, u imponua nga ana e Rusisë me përdorimin e mjeteve ushtarake,” tha Schieb.
Duke folur për nismën “Ballkani i Hapur”, Schieb tha se kjo mund të çojë në realizimin e synimeve të procesit të Berlinit, përcjellë Gazeta Blic.
