Zyrtarët policorë me uniformë, por edhe jashtë detyrës zyrtare shpesh herë përballen me sulme verbale nga qytetarët. E këta të fundit në shumë raste eskalojnë edhe në kërcënime e sulme fizike ndaj policëve, raporton Gazeta Sinjali.
Me një sulm fizik është përballur mbrëmë edhe një pjesëtar i Policisë, i cili ndodhej jashtë detyrës zyrtare.
Sinjali mëson se në pompën e derivateve ‘Exfis’ në fshatin Sllatinë të Fushë Kosovës, një person kishte hyrë me armë dhe si rrjedhojë të pranishmit që ndodheshin aty janë ndjerë të frikësuar. Për këtë arsye ata kanë kërkuar ndihmë nga zyrtari policor, i cili ka hyrë brenda që të ballafaqohet me të dyshuarin.
Sipas burimeve 32-vjeçari ka kërcënuar me vrasje policin dhe të njëjtin më pas e ka sulmuar fizikisht dhe ia ka drejtuar armën të cilën kishte me vete.
Pas kryerjes së këtij veprimi, i dyshuari është larguar në drejtim të panjohur, mirëpo i njëjti është arritur që të kapet disa metra larg vendit të ngjarjes.
I dyshuari është shoqëruar në stacion policor dhe ndaj tij kanë nisur hetimet nën dyshimet për kryerjen e veprës penale ‘Sulm ndaj personit zyrtar’ dhe ‘Mbajtje në pronësi, kontroll ose posedim të paautorizuar të armës’.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit në kohëzgjatje prej 48 orësh.
