Nuk janë të rralla rastet kur zyrtarët e institucioneve të ndryshme pranojnë ryshfet, ndërsa me denoncimin dhe zbulimin e rasteve, përfundojnë në prangat e Policisë së Kosovës. Një rast i tillë është raportuar së fundmi në Gjakovë, ku Njësia Rajonale për Hetimin e Krimeve Ekonomike dhe Korrupsionit në Gjakovë ka arrestuar një zyrtar të Qendrës Rajonale për Punësim, nën dyshimin për marrje ryshfeti, raporton Gazeta Sinjali.
Burimet e Sinjalit kanë bërë me dije se zyrtari i IT-së në Qendrën Rajonale për Punësim, Fitim Halili (rreth 53-vjeçar), dyshohet se ka kërkuar dhe pranuar 150 euro ryshfet nga një person, me qëllim që t’i rregullonte dokumentacionin për përfitimin e shtesave të lehonisë për bashkëshorten e tij.
Pas denoncimit, Policia ka realizuar një operacion të fshehtë duke zbatuar masën e simulimit të dhënies dhe marrjes së ryshfetit, bazuar në urdhëresën e Gjykatës Themelore në Gjakovë.
Gjatë kontrollit në zyrën e të dyshuarit, janë sekuestruar si prova 150 euro-t që ai kishte marrë nga i dëmtuari.
I dyshuari është intervistuar në prani të avokatit dhe me vendim të prokurorit, i është caktuar masa e ndalimit për 48 orë.
Hetimet në lidhje me këtë rast janë duke vazhduar.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
