Ndeshja mes AEK-ut të Athinës dhe Dinamo Zagrebit e vlefshme për turin e tretë kualifikues të Ligës së Kampionëve, është anuluar! Takimi që ishte planifikuar të luhej sonte në mbrëmje, nuk do të luhet dhe vendimi është marrë pak minuta më parë, kur dy klubet janë takuar në një mbledhje me UEFA-n.
Trazirat e mbrëmshme në Athinë dhe vrasja e tifozit grek nga ultrasit e Dinamo Zagrebit, kanë bërë që drejtuesit e AEK-ut të tërhiqen nga mbledhja duke e konsideruar si jo etike që të luhet ndeshja në kushte kur tifozët rrezikojnë seriozisht mbarëvajtjen e saj, sidomos mbas incidenteve që kanë ndodhur së fundmi.
Tashmë, ka mbetur vetëm që UEFA të dalë në një komunikatë zyrtare dhe të njoftojë për shtyrjen e ndeshjes dhe do të përcaktohet edhe data e re se kur skuadrat do të zbresin në fushë. Për këtë incidente, janë arrestuar 98 tifozë të skuadrave ndërkohë që të plagosur kanë mbetur 8 të tjerë.
Ndërkohë sipas gazetarit grek, Giannis Chorianopoulos, ndeshja e parë do të luhej me datë 15 gusht, ndërsa ajo kthyese vetëm tre ose katër ditë më vonë, mirëpo duke mos precizuar vendin e zhvillimit të takimeve.
Të njëjtat ka gjasa të zhvillohen në stadiumet respective, mirëpo pa praninë e publikut.
