Zyra e zëvendëskryeministrit Besnik Bislimi ka dërguar sot një komunikatë për media në lidhje me pjesëmarrjen e tij në ‘’Belgrade Security Conference’’ të organizuar në Beograd.
Edhe pse mediumi serb “Danas” raportoi se Bislimi ka folur për planin e propozuar franko-gjerman si zgjidhje për normalizimin e raporteve ndërmjet Kosovës dhe Serbisë, në komunikatën e dërguar nga zyra e tij nuk përmendet asnjëherë se u diskutua për propozimin në fjalë.
Ai citohet të ketë thënë se “propozimi franko-gjerman është shumë më afër qëndrimit të Serbisë sepse nuk paraqet marrëveshje përfundimtare dhe nuk përmban njohje reciproke në këtë fazë”.
Të vetmin propozim që e përmend komunikata është ai i përgatitur nga kryeministri Albin Kurti me gjashtë pika të cilin ua kishte propozuar presidentit serb Aleksandar Vuçiq dhe emisarit evropian për dialogun Miroslav Lajçak gjatë takimeve në Bruksel.
“Zëvendëskryeministri Bislimi, foli mbi objektivin dhe qëllimin që në fillim të Qeverisë Kurti II, që në procesin e dialogut, të flitej për marrëveshjen finale, ku përmendi propozimin e përgatitur me gjashtë elemente se si ky normalizim gjithëpërfshirës do të dukej, të dorëzuar tek z. Lajcak jo vetëm kur u diskutua publikisht në takimet e 18 gushtit, por edhe gjatë çerekut të fundit të vitit 2021”, shkruan në komunikatën e dërguar për media.
Për t’u informuar më shumë se çfarë diskutoi Bislimi në Beograd, klikoni në linkun e mëposhtëm.
