Zëvendës Sekretarja e NATO-s, Radmila Shekerinska, ka folur edhe për shqetësimet dhe disa informata që kanë qarkulluar rreth mundësisë që SHBA të tërheq trupat e saj nga misioni i KFOR-it në Kosovë.
Shekerinska ka thënë se këto informacione kanë dalë të jenë të rreme dhe se NATO është e përkushtuar ndaj misionit të KFOR-it në Kosovë.
“Ka pasur pretendime të tilla që rezultuan të rreme. Është e rëndësishme që Aleanca ka treguar përkushtimin e saj ndaj misionit, dhe aleatët kanë dërguar së fundi më shumë trupa. Askush nuk duhet të dyshojë në përkushtimin dhe vendosmërinë e Aleancës”, ka deklaruar ajo për Kosovo Online, trasnmeton Gazeta Papirus.
Shekerinska ka deklaruar tutje se Alenaca Veriatlantike është e përkushtuar për një paqe afatgjate në gjithë rajonin e Ballkanit Perëndimor.
“Kohët e fundit vizituam KFOR-in, Sekretari i Përgjithshëm të NATO-s, unë vetë dhe të gjithë Këshilltarët e Atlantikut të Veriut, gjë që është një tregues i qartë i përkushtimit dhe interesit të Aleancës për të mbështetur më tej dialogun, një zgjidhje paqësore dhe stabilitetin rajonal”, shton tutje ajo.
Shekerinska ka potencuar se NATO mbetet e përkushtuar edhe ndaj dialogut mes Kosovës dhe Serbisë dhe thotë se roli i Aleancës dhe KFOR-it është që të bind të gjithë se zgjidhja mund të vijë vetëm nga dialogu politik.
“Ne kemi qenë të përkushtuar ndaj rajonit gjatë dekadave të fundit, dhe pikërisht për shkak të çështjes së dialogut, unë u takova me Përfaqësuesin Special të BE-së për Dialogun Beograd-Prishtinë për të diskutuar fushat ku NATO dhe BE mund të bashkëpunojnë edhe më mirë. Roli ynë është shumë i qartë, ne kemi misionin më të madh dhe më të gjatë në kohë – KFOR-in, i cili duhet të bindë të gjithë se vetëm dialogu politik mund të kontribuojë në një zgjidhje reale të problemit dhe stabilitet politik për të gjithë.”
