Prokuroria Themelore e Prishtinës ka nisur hetimet lidhur me zjarrin që shpërtheu sot në depon e objektit të Qeverisë (ish-Rilindja).
Lajmin e ka konfirmuar zëdhënësja e kësaj prokurorie, Laureta Ulaj.
Ulaj ka thënë se rasti është iniciuar si “zjarrëvënie”.
“Ju njoftojmë se sot rreth orës 16:00, prokurori kujdestar është njoftuar nga policia për një shpërthim zjarri në depon e objektit të Qeverisë (ish-Rilindja), me ç’ rast menjëherë ka dalë në vendin e ngjarjes bashkë me njësitë e tjera relevante. Ekipi i zjarrfikësve kanë arritur ta lokalizojnë dhe shuajnë zjarrin, ku fatmirësisht nuk ka pasur dëme në njerëz, derisa me urdhër të Prokurorit të Shtetit rasti është iniciuar “Zjarrëvënie” dhe në koordinim me institucionet relevante janë duke u ndërmarrë të gjitha veprimet e nevojshme hetimore, me qëllim të ndriçimit të rrethanave të këtij rasti”, ka deklaruar Ulaj për Express.
