Ukraina ka akuzuar Rusinë se po përpiqet të bllokojë hyrjen e saj në det ndërsa Rusia përgatitet për stërvitjet detare javën e ardhshme.
Sipas BBC ministri i Jashtëm ukrainas Dmytro Kuleba tha se Deti Azov është plotësisht i bllokuar dhe Deti i Zi është pothuajse plotësisht i ndërprerë.
Një zhvillim i tillë vjen në kohën kur rreth 100,000 trupa ruse janë vendosur tashmë pranë kufijve tokësorë të Ukrainës.
Kjo vjen gjithashtu pasi Rusia dhe Bjellorusia filluan 10 ditë stërvitje të përbashkëta ushtarake pranë kufirit Bjellorusi-Ukrainë.
Bjellorusia është një aleat i ngushtë i Rusisë dhe ka një kufi të gjatë me Ukrainën.
Stërvitjet detare të Rusisë do të zhvillohen javën e ardhshme në dy detet në jug të Ukrainës, Detin e Zi dhe Detin Azov.
Rusia ka lëshuar paralajmërime bregdetare duke përmendur stërvitjet e gjuajtjes me raketa dhe armë
Kështu, ministria e Jashtme e Ukrainës tha se “zona e paprecedentë e gjerë ku do të kryhen manovrat e bën lundrimin në të dy detet praktikisht të pamundur” dhe ministri i Mbrojtjes, Oleksiy Reznikov shkroi në Twitter se ujërat ndërkombëtare të dy deteve ishin bllokuar nga Rusia.
Tensionet kanë qenë të larta midis Rusisë dhe Ukrainës në rajonet e Detit të Zi dhe Detit Azov që kur Rusia aneksoi Krimenë në vitin 2014. Në vitin 2018, Rusia sekuestroi tri anije detare ukrainase.
Stërvitjet detare në krahun jugor të Ukrainës janë si shtesë e 10 ditëve të stërvitjeve ushtarake që po zhvillohen aktualisht në Bjellorusi, në veri të Ukrainës.
Rusia gjithashtu ka grumbulluar tanke, artileri dhe dhjetëra mijëra trupa pranë kufirit të saj me Ukrainën, por mohon planifikimin për të pushtuar.
Por SHBA dhe vende të tjera perëndimore kanë paralajmëruar se një sulm mund të ndodhë në çdo kohë.
