Ndjenja “Aha!” e Di Caprios se “unë jam q’aj” na merr mendja ta ketë përshkuar Dimal Bashën – kur diskursi i LDK-së ra në binarët e akuzave të Vetëvendosjes: dhe kjo për votat me postë të diasporës.
Se kush përfiton më së shumti nga zënka mes vete e Lidhjes Demokratike e Kosovës, që kreshendon e gjeti me Avdullah Hotin duke iu referuar m’u bash atyre votave: s’do shumë mend, Vetëvendosja.
Hoti – nga politikanët më arçetipë të LDK-s – kërkoi largim të drejtuesit të partisë, Lumir Abdixhikut, duke e vendosur në piedestal fajesh për ‘mossuksesin’ me një elaborat të madh ankimi ndaj tij. Hoti postuloi sukes të LDK-së atëherë dhe vetëm atëherë kur Abdixhiku të mos e drejtojë atë.
Vetëvendosja cakërron gota…
Para kësaj: ishin të sigurt, sikur trekëndëshi që i ka tre kënde, se me vota të diasporë numrin e mandatave do ta çonin në 51 deputetë. LDK në diasporë i frenoi në 48.
Trendi agresiv në favor të Vetëvendosjes në votat në konsulata dhe ambasada, me rreth 80%, prodhoi gëzim premartur për këtë parti – deri kur ato me postë ia ndalën hovin dhe e kthenë në rikferc të 58% të votës së diasporës.
Matematika s’u matematikoi: i përvjelën mëngët me elaborate të skemave të pretenduara nga LDK për kanalizim e koncentrim të votës së LDK-së në diasporë: dhe e gjetën ‘scapegoat’-in: Hysen Çekajn.
Por, duket se mu kjo rrymë akuzash u depërtoi nën lëkurë edhe vetë LDK-së: votat me postë u bënë mollë sherri mes vete, me dyshime të ndërsjella për favorizim të dikujt-diku-nga-dikush.
Enter Dimal Basha…
Prej më ‘të shquarve’ në diskurs polarizues, Basha e këndoi për miratim të akuzave të Vetëvendosjes ndaj LDK-së, akuzat e Avdullah Hotit ndaj LDK-së.
Goditi madje edhe RTK-në se pse s’e kanë dhënë në lajme statusin e Avdullah Hotit, duke iu “dhimbsur” televizioni publik.
Goditja – lexo: porosia – e Bashës ndaj RTK shkoi në veshtë e duhur: lajmi u dha në të tetë-e-gjysve: “E pa RTK statusin! S’pe di a statusin tim a të z. Hoti, por me rëndësi ju ra ndërmend me bë lajm!”.
Basha – në apologjinë e vetë ndaj Hotit – pretendoi se këtij të fundit “i janë vjedhë vota në Rahovec” duke nxjerr disa lexime jo-koherente.
Edhe tjetri deputet i peshave të rënda në akuzim të LDK-së, Mefail Bajqinovci, e mori për miratim të akuzave të VV-së ankesat e bëra në LDK.
“LDK ka manipuluar me rezultat, votat me postë në mërgatë shihet se si janë manipuluar nga LDK-ja. Se a janë manipuluar votat e thonë edhe vet deputetët e LDK-së. Akuza për vjedhje votash mes deputetëve të LDK-së dhe ankesa kemi lexuar ne media”, tha Bajqinovci për GazetaBlic.
Kjo në një kohë kur Vetëvendosja s’ka lanë instancë institucionale pa shterrur duke provuar të anulojë votat e LDK-së dhe përsëritjen e votave me postë në diasporë: kjo më shumë si një çështje që ka bërtitur shtyrje të certifikimit të rezultateve me çdo kusht.
Arsyeja? Të mos pasurit numra për të bërë shumicë parlamentare.
“Faksioni” Hoti
I pesti më i votuar ‘pikë e pesë’ LDK-në: Avdullah Hoti.
Nga dita e parë – qysh edhe i është dukur ballit – Avdullah Hotit s’është paraqitur për ithtar për atë që kishte marrë timonin dhe frenat e partisë: Lumir Abdixhikun.
Tek një muaj pas zgjedhjeve, Avdullah Hoti, një prej figurave më arçetip të partisë – haptazi ia faturoi ‘mossukessin’ Abdixhikut.
Me fraza aq të ngurta të përkthyeshme deri në pamundësi suksesi të partisë me Abdixhikun si drejtues.
“Nuk ka rrugë tjetër për rikthimin e besimit në LDK”, shkroi Hoti.
Miratues të qëndrimit të Hotit? Pakkush.
Arben Gashi, Rrezarta Krasniqi – dhe i ‘ekskomunikuari’ nga lidershipi i Abdixhikut, Agim Veliu – i bën ‘like’ duke u lexuar kështu për pajtim implicit me Hotin.
Por, në hierarki të partisë qëndrimet e Hotit u panë “të pakuptimta”.
Nënkryetarja e Parë, Doarsa Kica-Xhelili s’e përfilli për përmbajtësor elaboratin e pakënaqësive të Avdullah Hotit.
“Qesharake, të pakuptimta, jo koherente”, tha ajo në një përgjigje me shkrim për Nacionale.
