Zëdhënësi i Shtabit të KFOR-it, kolonel Andrea Gallien, tha se janë të gatshëm që të përdorin të gjitha masat nëse eskalon situata në veri. Madje, ai tha se ushtarët e KFOR-it janë të trajnuar dhe të gatshëm për çdo rast.
Në një konferencë për medie, ku foli për aktivitet e KFOR-it, ai sqaroi se në vazhdimësi kanë kontakte me institucionet e Kosovës, por që me 29 maj kur kryetarët e katër komunave veriore u vendosën në zyrat e tyre nuk pati koordinim.
“KFOR-i është i gatshëm të veprojë në çdo situatë të eskalimit. Ushtarët tanë janë të trajnuar dhe të gatshëm për të përdorur te gjitha rrugët nëse është e nevojshme”.
“Komandanti i KFOR-it është vazhdimisht në kontakt me institucionet e Kosovës. Nuk mund të them se kishte koordinim me 29 maj”.
“Kur këto ngjarje kanë nisur, do të thotë disa ditë para 29 majit, nuk mund të them se ka pasur koordinim, sepse ka qenë veprim i njëanshëm, i marrë prej institucioneve të Kosovës, për t’i dërguar kryetarët nëpër komuna, përmes përdorimit të forcës”, shtoi ai.
Sipas tij, tashmë duket se situata është më e qetë, megjithatë thotë se po e monitorojnë situatën. Duke shtuar se dialogu është e vetmja zgjidhje.
Ai foli edhe për ushtarët e lënduar ku tha se ushtarët italian janë dërguar në Itali për trajtim.
Gallieni shtoi se 500 ushtarë nga Turqia janë trajnuar dhe janë të gatshëm të intervenojnë në rast nevoje.
“KFOR po vepron konform Rezolutës së Këshillit të Evropës për të mbrojtur të gjitha komunitetet në Kosovë. Dialogu është e vetmja zgjidhje për ta zgjidhur këtë problem. Nga ana e sigurisë, situata duket se është përmirësuar”.
“Gjatë protestave janë lënduar shumë ushtarë nga përdorimi i forcës dhe armëve. Shumë ushtarë nga Italia dhe Hungaria janë lënduar. Në fillim ishin 11 ushtarë italianë, në ditët pasuese kishte edhe me shumë. Nuk kanë qenë në rrezik për jetë. Ata janë dërguar në Itali për trajtim mjekësor”.
“Kanë ardhur trupa të rinj në Kosovë, 500 janë nga Turqia. Ata janë duke u trajnuar që të jenë të gatshëm në rast nevoje”./eo
