Edhe Xhelal Sveçla, ministër i Brendshëm, pas Policisë së Kosovës, ka reaguar rreth thirrjes për qytetarët shqiptarë për marshim drejt veriut, duke thënë se, kjo thirrje është nga profile të dyshimta dhe e panevojshme, njofton Gazeta Papirus.
Po ashtu, ministri i Brendshëm ka thënë edhe se, kjo nuk i ndihmon Kosovës, dhe se përmes kësaj thirrje, po tentohet të nxiten tubime të panevojshme.
“Thirrjet për protestë në jug të Mitrovicës dhe me synim marshimin drejt veriut të vendit, janë të panevojshme dhe nuk i ndihmojnë Republikës së Kosovës. Përmes këtij organizimi në rrjetet sociale po tentohet të nxiten tubime të panevojshme. Sipas vlerësimeve nga institucionet e sigurisë, kjo thirrje po përhapet nga persona të panjohur dhe profile të dyshimta nëpër rrjetet sociale”, ka thënë minsitri ndër tjerash.
Postimi i plotë:
Qytetarë të dashur,
Thirrjet për protestë në jug të Mitrovicës dhe me synim marshimin drejt veriut të vendit, janë të panevojshme dhe nuk i ndihmojnë Republikës së Kosovës.
Përmes këtij organizimi në rrjetet sociale po tentohet të nxiten tubime të panevojshme. Sipas vlerësimeve nga institucionet e sigurisë, kjo thirrje po përhapet nga persona të panjohur dhe profile të dyshimta nëpër rrjetet sociale.
Mbështetja e madhe qytetare e këtyre ditëve karshi vendimeve të Qeverisë dhe institucioneve tona, të drejta dhe legjitime, janë garancë e vendosjes së kushtetutshmërisë dhe ligjshmërisë në veri të vendit.
I ftoj të gjithë qytetarët që të mos i përgjigjen këtyre thirrjeve të dyshimta dhe organizimeve anonime.
