Paneli Zgjedhor për Ankesa dhe Parashtresa ka marrë vendim që të refuzojë si të pabazuara ankesat e Vetëvendosjes kundër vendimit të Komisionit Qendror të Zgjedhjeve për shpalljen e rezultateve përfundimtare.
PZAP ka refuzuar ankesën për anulim të votave me postë dhe atë për rinumërim të atyre në Skenderaj.
Sipas PZAP0-së, u refuzua si e pabazuar ankesa e LVV-së e paraqitur kundër KQZ-së për shpalljen e rezultateve përfundimtare për zgjedhjet, ku pati kërkuar që të anulohen rezultatet e votimit me postë për LDK-në dhe kandidatët e saj, gjithsej 18,933 vota dhe që këto të largoheshin nga rezultatet përfundimtare.
Gjithashtu, u refuzua ankesa për manipulim të votave ndaj PDK-së, ku LVV kishte pretenduar se në vendvotimet në Skenderaj kandidati i PDK-së, Bedri Hamza, në shumicën e vendvotimeve ka marrë 94% deri 100% të votave dhe këtë e kishte quajtur të pamundur “që kandidatët për kryeministër të kenë 100% të votave në vendvotime të caktuara”.
