“Unë nuk mendoj se dikush i zgjuar, normal, duhet të nënshkruajë një lloj marrëveshjeje që e çon Kosovën në Kombet e Bashkuara. Edhe ata që thonë se duhet pranuar, besoj se do t’u dridhej dora”, ka thënë ish ministri serb i Punëve të Jashtme, Vuk Jeremiq.
I pyetur nëse tash është pika e kthesës, Jeremiqi përgjigjet se nuk është dhe senuk pret të ndryshojë ndonjë gjë domethënëse. Ai nuk beson se do të nënshkruhet ndonjë dokument i rëndësishëm, transmeton Demokracia.com.
“Nuk mund të spekuloj se çfarë është shkruar në propozim, sepse ne nuk kemi pasur njohuri, kemi kërkuar që të na japin përmbajtjen e atij propozimi. Ndonjëherë lëshohen drafte që nuk janë saktësisht ato që po shqyrtohen, kështu që nuk do të spekuloja. Ne si Parti Popullore mendojmë se koncepti i diskutimit të çdo dokumenti duhet të refuzohet në formatin e Quit-it, sepse Këshilli i Sigurimit i OKB-së është organi i vetëm ku mund të diskutohet për statusin e ardhshëm të Kosovës”, tha Jeremiq.
Siç theksoi ai, propozimi që e çon Kosovën në OKB dhe çdo gjë që zgjidh statusin e Kosovës jashtë Këshillit të Sigurimit dhe e çon në OKB “nuk ka kush ta nënshkruajë”.
“Mendoj se Vuçiq nuk ka ndërmend të nënshkruajë. Është e rrezikshme të kapesh në një cikël të tillë në një format ku nuk ke aleatë për të negociuar për statusin e ardhshëm të Kosovës, edhe nëse nuk ke ndërmend ta nënshkruash atë. Kur futesh në një situatë të tillë, atëherë gjërat mund të dalin lehtësisht jashtë kontrollit dhe brenda natës gjendesh në një Rambuje të re me një letër përpara që as nuk mund ta firmosësh dhe as nuk mund ta hedhësh poshtë. Koncepti i negocimit të statusit të Kosovës në këtë formë duhet të hidhet poshtë”, shtoi kryetari i Partisë Popullore për N1.
Ai gjithashtu beson se plani i Vuçiqit është të fajësojë Aljbin Kurtin për dështimin e përpjekjeve aktuale dhe shton se Kurti është treguar i “patalentuar në kuptimin diplomatik”.
“Të futesh në këtë lloj historie është e rrezikshme, mund ta gjesh veten në rrethana ku nuk ke një zgjidhje të mirë. Këtë na e thotë përvoja e Rambujesë”, thotë Jeremiq.
I pyetur se çfarë bëri qeveria e atëhershme kur Kosova shpalli pavarësinë, Jeremiq tha se ka pasur rezistencë diplomatike.
“Ne kemi bërë një rezistencë të tillë diplomatike, saqë kur e njohën pavarësinë, menduan se gjithçka do të mbaronte për dy-tre muaj. Kemi bërë mjaft që vite më vonë Kosova nuk mund të lëvizë pa pëlqimin e Serbisë”, thotë ai.
Nëse plani është i përafërt me atë që u shfaq në media, qëndrimi i Partisë Popullore është se ai duhet të refuzohet, thotë Jeremiq.
