Presidenti i Serbisë, Aleksandar Vuçiq, ka nisur një konferencë të jashtëzakonshme për mediat në Serbi, pas tensioneve të fundit në veri të Kosovës.
Ai foli për vrasjen e policit Afrim Bunjakut nga terroristët serbë duke shtuar se “nuk mund ta arsyetojnë vrasjen”.
”Nuk dua ta arsyetoj në asnjë mënyrë vrasjen e policit shqiptar. Kjo është dicka që nuk iu desh askujt”.
Ai tha se janë 22 sulme shpërthyese dhe mbi 40 lëvizje drejtuar serbëve.
“Serbët dhe jo njerëzit nga Serbia qendrore siç gënjyen, u revoltuan dhe nuk duan të vuajnë më terrorin e Kurtit. Që nga 3 nëntori, kur Kurti shkarkoi komandantin Gjuriq, ata kanë përdorur Policinë e Kosovës kundër serbëve 62 herë, 22 lëvizje të përshkallëzuara në veriun e Kosovës, 56 sulme me motive etnike ndaj serbëve, ishte vetëm çështja se kur, veçanërisht ata që ndiqen nga policia dhe që vazhdimisht lëvizin në rrugën qendrore Serbi-Kosovë, do të përpiqen të bëjnë diçka për veten dhe nuk dua të justifikoj vrasjen e një polici shqiptar, kjo është e dënueshme dhe askush nuk kishte nevojë për këtë në momentin kur të gjithë e kuptuan se Kurti ishte organizatori kryesor i kaosit në Republikën e Kosovës”, tha Vuçiq.
Në orët e para të së dielës në një sulm u vra polici i Kosovës, Afrim Bunjaku. Në një aksion të policisë, pasi sulmuesit u futën në Manastirin e Banjskës, janë vrarë tre sulmues, ndërsa janë arrestuar gjashtë të tjerë. Sipas autoriteteve të Kosovës, të vrarët dhe të arrestuarit janë grup mercenar i organizuar nga Beogradi.
