Analisti politik Arbër Vllahiu ka thënë se qëndrimi i ambasadorit gjerman në Kosovë, Jorn Rohde, për politikanin Xhafer Deva paraqet problemin e kosovarëve për historinë e tyre.
“Po flasim për një deklaratë të një ambasadori, e cila shpërfaq në mënyrën më të mirë gjithë problemin që e kemi në shoqërinë tonë, e kemi problemin e historisë që ose e kemi gjysmake ose nuk e kemi fare. Në Kosovë problematika është me historinë e Kosovës si histori si dhe me historinë e Kosovës në rrethana të caktuara kohore”, ka thënë Vllahiu.
Në Rubikon ai ka theksuar se figura e Xhafer Devës duhet të analizohet në tërësi.
“Tani problemi te Xhafer Deva ose te cilido prej udhëheqësve të kohës është e ndërlidhur edhe me rrethana të caktuara në atë periudhë që jetonin. Ne nuk mund ta heqim figurën, ne nuk mund të themi që nuk është figurë kundërthënëse, nuk mund të themi se si figurë e tillë ose është e mirë ose është e keqe, duhet me e përmbledhë në tërësinë e tij se si është ajo figurë”.
“Xhafer Deva nuk del si figurë as engjëll, as dreq, nuk mundemi me e ngatërruar në krejt këtë farë vorbulle. Por, një gjë thelbi është që ne ende nuk e kemi hapur në tërësi ta diskutojmë se pse në një periudhë të caktuar të jetës së tij ka pasur një zhvillim kaq negativ, që çon drejt bashkëpunimit me gjermanët e kohës”, ka thënë Vllahiu.
