Hiç më pak se 55 faqe përmban aktakuza e Prokurorisë Speciale të Kosovës me të cilën po i akuzon për spiunazh Bedri Shabanin dhe Muharrem Qerimin.
Sipas Prokurorisë, Muharrem Qerimi, i cili punoi në Policinë e Kosovës deri në vitin 2009, ka përdorur metodën e njëjtë si Bedri Shabani për të mbledhur informacione të rëndësishme dhe të ndjeshme për sigurinë e shtetit të Kosovës, të cilat në të njëjtën mënyrë si ai, ia ka transmetuar BIA-s serbe, raporton Kiks Kosova.
Qerimi njëlloj si Shabani akuzohet se këto materiale dhe informacione ia ka përcjellë Shërbimit të Inteligjencës Serbe, përmes Sërgjan Rosiqit, zyrtar i lartë i BIA-s, duke kryer veprën penale të “spiunazhit”.
Ish-polici i Kosovës, në seancën e të hënës së 17 marsit, nuk e pranoi fajësinë për spiunazh. Vepra e vetme penale të cilën e pohoi se e kreu, ishte ajo e armëmbajtjes pa leje.
Në aktakuzën e siguruar nga Kiks Kosova, Prokuroria konfirmon se ka në dorë prova të cilat dëshmojnë se bashkëpunimin me BIA-n serbe, me qëllim spiunazhin, 58-vjeçari nga Ferizaj e nisi të paktën nga 24 maji i 2012-ës.
Sipas Speciales, pasditen e fundmajit, Qerimi e kishte kaluar kufirin me Serbinë përmes pikës kufitare Dheu i Bardhë dhe me të dalë në zonën neutrale, kishte zbritur nga vetura e tij dhe kishte hipur në një veturë me targa të Beogradit, e cila Prokuroria pohon se i përkiste shërbimit inteligjent të BIA-së.
Muharrem Qerimi akuzohet se veprimtarinë e tij të spiunazhit e kishte kryer edhe përmes disa letrave të cilat ia kishte adresuar dikujt me nofkën “Papa Oskar” dhe në të cilat kishte shkruar për korrupsionin dhe largimin e “Cezarit” nga froni.
Nga provat që siguroi Prokuroria dhe ekzaminimit të telefonit të Qerimit, vërtetoi se vetëm gjatë periudhës 14 prill 2023 deri më 5 prill 2024, ish-polici kishte komunikuar rreth 100 herë me një person të quajtur Sllavisha Stankoviq, me të cilin e kishte kaluar edhe kufirin me Serbinë.
Specialja faktoi se Qerimi ka mbledhur informacione dhe të dhëna për luftën e UÇK-së, eprorët e saj, eprorët e Policisë së Kosovës, ata të Inspektoratit Policor, për krimet në Kosovë dhe emrat e të të burgosurve, informacione të cilat ia ka transmetuar BIA-së, përmes Sërgjan Rosiqit. /Klankosova.tv
Për detaje, ndiqeni kronikën në vijim:
