Policia e Kosovës ka arrestuar tre të dyshuar për vjedhjen e mjeteve të punës të llojeve të ndryshme.
“Drejtoria Rajonale e Policisë Gjilan, njësiti i hetimeve të stacionit policor Kamenicë, me datën 16.03.2023 pas një pune hetimore mirë të organizuar dhe veprimeve operacionale, ka arritur që t’i lokalizojë dhe të arrestojë tre të dyshuar shqiptarë kosovarë S. K. (viti i lindjes 1981), E. B. (viti i lindjes 2001) dhe L. S. (viti i lindjes 1998)”, thuhet në njoftimin e policisë.
Sipas policisë, arrestimi i tyre është bërë pasi të njëjtit dyshohet se në bashkëveprim kanë qenë të involvuar në një rast “vjedhje e rëndë”, të ndodhur me 16 shkurt 2023, në të cilin rast ishin vjedhur mjete pune të llojeve të ndryshme.
“Pas arrestimit nga të dyshuarit janë sekuestruar sendet e dyshuara të vjedhura të cilat pas verifikimit do t’i kthehen pronarit legjitim. Në lidhje me rastin është njoftuar prokurori i Shtetit i cili ka urdhëruar që ndaj të dyshuarve të ngrihet kallëzim penal për veprën penale ‘vjedhje e rëndë’ dhe rasti me kallëzim penal do të përcillet në Prokurorinë Themelore”, thuhet në njoftimin e policisë.
