Dy asamblistët në Kuvendin komunal të Prishtinës, Berat Lahu dhe Edmond Azemi janë tërhequr nga grupi i asamblistëve të VV-së.
Para seancës së sotme të Kuvendit Komunal, Lahu dhe Azemi janë pozicionuar si të pavarur.
Të dy asamblistët të cilët fituan ulëse në Asamblenë Komunale duke garuar me Lëvizjen Vetëvendosje, ishin përballur me presion direkt nga Gëzim Sveçla, shefi i asamblistëve të LVV-së, në fund të vitit të kaluar kur vendosën të votojnë buxhetin për vitin 2025, raporton Paparaci.
Disa video që tregonin përplasjen në mesin e seancës së jashtëzakonshme për votimin e buxhetit për vitin 2025, kishin bërë bujë në media.
Lahu e akuzoi Sveçlën për qëndrimin në sallë të asamblistëve të LVV-së në janar të vitit 2024, për t’ia mundësuar pushtetit të Përparim Ramës kuorumin për këmbimin e pronave të ish-bashkëpunëtorëve të tij në projektin e Badovcit, ku nuk lejohen ndërtimet, me një pronë komunale që ka vlerë rreth 20 milionë euro. Projekti më vonë ishte anuluar.
Ndërkaq, Sveçla i tha Lahut se është shantazhuar për “hajnitë”, duke iu referuar ndjekjes së Lahut nga Prokuroria mbi dyshimet për përfshirje në rastin “Brezovica”.
Prezent gjatë diskutimeve, sipas video-incizimit, ishin edhe Ilir Kërçeli, shefi i kabinetit të kryeparlamentarit Glauk Konjufca dhe Berita Abazi, asistente e ministres së Drejtësisë, Albulena Haxhiu.
Me largimin e dy asamblistëve, Lëvizja Vetëvendosje mbetet me 15 asamblistë në Kuvendin Komunal.
