Sekretarja e Përgjithshme e Partisë Demokratike të Kosovës, Vlora Çitaku, ka reaguar pas miratimit të vendimit për ndalimin e platformës TikTok në të gjitha institucionet publike.
Në një postim në rrjetin social Facebook, Çitaku i ka bërë thirrje Qeverisë që krahas këtij vendimi, t’i ndalojë edhe kontratat njëburimore, shkeljet serike të Kushtetutës e subvencionet për familjarë.
“Ndalohet TikTok-u në të gjitha institucionet e Republikës së Kosovës. Lajm i mirë ky.
Me këtë harxh, ndaloni edhe kontratat njëburimore, shkeljet serike të Kushtetutës, subvencionet për familjarë, etj etj”, shkroi ajo.
Ndryshe, Qeveria e Kosovës ka miratuar propozim-vendimin për ndalimin e funksionimit të shërbimeve të rrjetit social TikTok në të gjitha institucionet publike të vendit.
Kjo u tha se po bëhet me qëllim të eliminimit të rreziqeve për sigurinë kibernetike nga përdorimi i rrjetit social Tik-Tok.
Vendimi u mor në mbledhjen e sotme të Qeverisë.
