Presidenti i Shteteve të Bashkuara të Amerikës, Donald Trump, dje ka nënshkruar një urdhër ekzekutiv përmes të cilit ka kufizuar disa agjencia federale, si dhe median ‘‘Zëri i Amerikës’’, që është media e financuar nga qeveria.
Në lidhje me këtë ka reaguar gazetari Elez Biberaj që ka qenë pjesë e VoA-s.
Gazetari ka thënë se Zëri i Amerikës që ka qenë dritë shprese dhe e të vërtetës ‘‘u hesht sot në emër të uljes së burokracisë federale’’.
Ai ka thënë se ky vendim do të shkaktojë dëme për imazhin e SHBA-së.
‘‘Zëri i Amerikës, një dritë shprese dhe e vërtetës për qindra miliona njerëz në mbarë botën, u hesht sot në emër të uljes së burokracisë federale. Për më shumë se tetë dekada, VOA ka qenë një forcë thelbësore në promovimin e idealeve demokratike të Amerikës, duke paraqitur besnikërisht politikat e SHBA-së, duke avancuar interesat kombëtare dhe duke shërbyer si një burim i besueshëm lajmesh për miliona njerëz në rajone që vuajnë nga mungesa e informacionit. Vendimi për të çmontuar një nga pasuritë më të mëdha kombëtare të Amerikës do të shkaktojë dëme të thella për imazhin e SHBA-së, interesat e saj globale dhe promovimin e vlerave demokratike – dëme që asnjë kundërshtar nuk mund t’i arrijë. Sot shënon një kapitull thellësisht të trishtë në historinë e angazhimit të Amerikës me botën’’, ka shkruar ai.
