Vedat Muriqi ka qenë protagonisti kryesor në fitoren dramatike të Mallorca 2-1 ndaj Espanyol të shtunën në La Liga.
Sulmuesi kosovar ka pasur një ndeshje me ulje-ngritje, duke shënuar një autogol dhe duke humbur një penallti, por duke u bërë në fund heroi i ekipit të tij me një gol vendimtar nga pika e bardhë në minutën e nëntëdhjetë e shtatë.
Pjesa e parë ka kaluar pa shumë raste të rrezikshme nga të dyja skuadrat, por gjithçka ka ndryshuar në fraksionin e dytë.
Espanyol ka kaluar në epërsi në minutën e pesëdhjetë e tretë, kur Muriqi ka devijuar aksidentalisht një krosim të Edu Exposito në rrjetën e tij. Gabimet për sulmuesin kosovar nuk kanë përfunduar këtu, pasi ai ka humbur një mundësi të artë për ta barazuar rezultatin nga penalltia, me portierin Joan Garcia që e ka pritur topin.
Megjithatë, Mallorca nuk ka vonuar shumë për të reaguar dhe vetëm dy minuta më pas, Takuma Asano ka barazuar shifrat me një goditje të saktë me kokë pas asistimit të Sergi Darder.
Pas këtij momenti, ndeshja ka marrë një dinamikë më të hapur, me të dyja skuadrat që kanë rrezikuar. Asano ka qenë pranë një dopiete, por gjuajtja e tij ka përfunduar jashtë, ndërsa Puado nga ana e Espanyol ka humbur një mundësi të mirë me një goditje të ulët që ka kaluar pranë shtyllës.
Dramën e madhe të takimit e kanë sjellur minutat e fundit. Mallorca fillimisht ka fituar një penallti, por pas ndërhyrjes së VAR, ajo është anuluar. Megjithatë, në minutën e fundit të kohës shtesë, vendasit kanë fituar një tjetër njëmbëdhjetë metërsh pas një faulli ndaj Abdon Prats.
Pas gabimit të parë të Muriqit, Prats ka marrë përsipër ekzekutimin, por García ka bërë një tjetër pritje. Sidoqoftë, gjyqtari ka urdhëruar përsëritjen e penalltisë për shkak të një parregullsie dhe kësaj radhe Muriqi e ka marrë përgjegjësinë, duke shënuar me një gjuajtje të fuqishme në trekëndësh.
Kjo fitore e rëndësishme e vendosë Mallorca në vendin e shtatë në La Liga, ndërsa Espanyol mbetet në pozitën e pesëmbëdhjetë në tabelën e kryesuar nga Real Madrid.
