Sot është ndarë nga jeta aktori i njohur, Xhevat Qorraj.
Lajmin e bëri të ditur Teatri Kombëtar i Kosovës përmes një njoftimi në Facebook.
“Me pikëllim të thellë morëm lajmin për humbjen e njeriut tonë të çmuar, aktorit të Teatrit Kombëtar të Kosovës e artistit të njohur, Xhevat Qorraj”.
Teatri Kombëtar thotë se rolet e tij në teatër dhe film do mbahen mend gjatë dhe do të vazhdojnë të ndriçojnë rrugën e artit për shumë gjenerata.
“Teatri Kombëtar i Kosovës do ta kujtojë Xhevat Qorrajn për talentin e tij të rrallë, rolet e tij të shumta, kolegialitetin e tij të pashoq dhe kontributin e tij të pafund në kulturën dhe artin tonë kombëtar. Le të kujtojmë dhe të nderojmë së bashku jetën dhe veprën e mrekullueshme të Xhevat Qorraj”.
Për ceremoninë e varrimit të aktorit do të njoftohet me kohë.
“Ngushëllime të sinqerta për familjen dhe të gjithë komunitetin artistik. Për detaje të ceremonisë së varrimit do të ju lajmërojmë me kohë!”.
Xhevat Qorraj ka lindur në vitin 1947 në fshatin Carrabreg të Deçanit.
Ai ka luajtur në një numër të madh filmash të ‘Kosova Filmit’ dhe të tjerë: ‘Si të vdiset’, ‘Proka’, ‘Rojet e Mjegullës’ etj. Ai gjithashtu ka luajtur edhe në filma e seriale televizive.
