Mbrëmë u raportua se Task Forca Anti-korrupsion në Policinë e Kosovës aktualisht është duke hetuar së paku pesë ministra dhe një zëvendësministër të Qeverisë së Albin Kurtit.
Sipas këtij raportimi nga “Betimi për Drejtësi” zëvendësministri i Infrastrukturës, Hysen Durmishi ishte njëri ndër ta, i cili thuhet se është duke u hetuar në lidhje me tenderin e tiketave.
Për këtë lajm, ka reaguar vetë Durmishi duke thënë se organet e rendit “le të hetojnë çfarë të duan”, teksa pohon se nuk ka bërë asnjë shkelje ligjore.
Sipas Durmishit, “automjetet e paregjistruara në Kosovë kanë rënë nën pragun prej 5%, ky ka qenë kriteri kryesor për kartonin e gjelbërt”.
Reagimi i plotë:
Mbrëmë është publikuar një lajm që po hetohem për rastin e tiketave ngjitëse
Le të hetojnë çfarë të duan jo vetëm për këtë rast por për çdo gjë që nga dita e parë kur kam filluar punën.
Ka kaluar një vit e katër muaj prej kur kemi filluar me aplikimin e tiketave ngjitëse me zero kosto për qytetarët.
Si rezultat i saj dhe masave tjera sot automjetet e paregjistruara në Kosovë kanë rënë nën pragun prej 5%. Ky ka qenë kriteri kryesor për kartonin e gjelbërt.
Tashmë i kemi plotësuar të gjitha kriteret teknike dhe jemi në rrugë të mbarë që të bëhemi pjesë e kartonit të gjelbërt.
Të tjerat janë të parëndësishme për mua sepse nuk kam bërë asnjë shkelje ligjore dhe rezultatet janë të matshme.
