Gazeta raportoi sot për një ngjarje të rëndë që ka ndodhur të martën në Fushë Kosovë, ku një person ka ndërruar jetë si pasojë e gjendjes së rëndë shëndetësore. Policia ka nisur hetimet për vdekjen e tij, teksa Sinjali ka mësuar detaje të reja lidhur me rastin.
Burimet brenda Emergjencës kanë bërë me dije se personi që vdiq është Basturk Ferhat, 64-vjeçar, shtetas i Turqisë, vdekjen e të cilit e ka konfirmuar ekipi mjekësor që ka dalë në vendin e ngjarjes.
Sipas informacioneve viktima ka qenë punëtor i kompanisë “Migros” dhe rasti dyshohet të ketë ndodhur në tualet, ku viktima fillimisht u gjet në gjendje të rëndë shëndetësorë.
Rastin e ka konfirmuar edhe Policia e Kosovës, me ç’rast është bërë e ditur se trupi i pajetë u dërgua në IML për obduksion.
“Viktima mashkull shtetas i Turqisë, ka kërkuar ndihmë mjekësore, pasi që gjendja e tij shëndetësore ishte e rëndë. Ekipi mjekësor në vendin e ngjarjes ka konstatuar vdekjen e viktimës. Me vendim të prokurorit, trupi i pajetë i viktimës është dërguar në IML për obduksion”, thuhet në njoftim.
Lidhur me rastin, Prokurori i Shtetit ka urdhëruar që rasti të cilësohet si “Hetim i vdekjes”.
